moraycf (..!التسركيل لاينتهي بنهاية رحلة بل يجب ان تكون حياتنا عبارة عن سفر دائم)
من بعد ماطليت على البحيرة الغوزية، كنت داير ف بلاني نخلّي سان لوي تكون آخر مدينة نزورها فاش نكون راجع ف حالي باش نتسركل فيها قبل من روصو نظرا للقيمة والمكانة التاريخية ديالها
وداكشي اللي كان من بعد ما شديت الطريق ليها بمختلف أنواع وسائل النقل آش من طوبيس، واش من طرونزيت، كار وطاكسي… ومشيا 👣.. وهادشي كاملو حيت تانوقف بزاف ف الطريق إلى بان ليا البلان ف شي كوان تاننزل ليه ونتسكع فيه.. وهاد القضية هي اللي كالت ليا الصرف بزاف😞 ولكن ماعليش مادام الاهم عندي هو التفواج والاستمتاع
فاش وصلت للمدينة كانت عندي نمرة ديال واحد السيدة مرّوكية -عايشة من هدا زمان فيها- عطاها ليا واحد الصديق » مهدي » فاش قشعني باللي مسركل ف السانيغال قترح عليا بإلحاح باش ندوز عندها إلى مشيت لهاد المدينة (سان-لويس) وشكرها ليا بزاف، وهادشي اللي كان من بعد ماتصلت بها ومن بعد السلام نعتات ليا الدار ومع وصلت عيان شديت طاكسي داني ديريكت 😎.. هزيت القفة منين خفافت
وفعلا فاش وصلت كتاشفت داكشي اللي شكر ليا العزاوي با مهدي لقيتو والو گدّام الصواب اللي لقيتو مستقبلاني بيه لالة فوزية گدام دارها – هاد السيدة معدنها نقي وبصوابها تعطب ولكن من هادشي صبيعات اديها ذهب فصنع الحلاوي والشهيوات ( لقيتها نيت خدامة ف صنع حليوات من داكشي الرفيع) وهادشي ماغريبش، إلى عرفتو باللي كان عندها مطعم بلمسة مرّوكية- ، مهم رحبات وكبرات بيا دخلت تعرفت على الزوج ديالها -جنسية سانيغالية السيد مأصّل- وبحديت خفيف أنا وياه تحدثنا وتناقشنا نقاش تعارفي.. ف الحقيقة ف هاد اللحظات القصيرة حسيت بحال إلى معرفة قديمة جامعني مع هاد العائلة..
وسط الحديت گالت ليا لاّ فوزية باللي كاين واحد السيد من مراكش ساكن تاهو هنا نعيّط عليه!.. بكل فرح قلت واه واه عيطي ليه نقرقبو معاه الناب.. عيطات ليه، جا تعرفت عليه، با مراد مراكشي مقطّر، نقايمي ف كلامو، ولكن فناااان مكتمل، فنان ديال بصّح، واللي دار الواجب تاهو مشكور دار بيا واحد التسريكيلة موطوريزية ف المدينة تعرفت من خلالها على أغلب البلايص، وختمنا التسركيلة بعراضة لدارو شفت فيها الاعمال الفنية ديالو وديال مراتو اللي قادات لينا عشيوة معتبرة تعشينا بيها ف جو من تبادل الحديث والبسط.. ومن بعد هاد اللحظات مع با مراد ومراتو رجعت عند لالة فوزية اللي كانت وجدات ليا قبل مانخرج واحد البلاصة فين غادي نبات كانت عبارة عن كوخ داكشي ديال الغابة كلشي فيه واللي دازت فيه ليلة بتجربة استثنائية ماتنساش..
ف الحقيقة بلاني لهاد المدينة كان ف شكل وصدق ف شكل كامل الأوصاف، أنا نبلاني والأحدات تاتوجّد ليا خير البلانات.. حيت فيها كان اول لقاء ليا مع ولاد البلاد وكانو ناس خيار
مهم ضرري تحطّو گدّامكم الخطة البديلة* وديك الساعة عيش اللحظة
خطة سايس مع الوقت وقضي بداكشي اللي موجود!.. ههه *-
***** ******** ******** Tssarkil ********** ******* ***
Breathing the Morning-air; Preservation of Health & Youthful Elasticity; Meditation & Respect .. are the objectives of the Wild-Trip!.. #moraycf
شوفو شوفو .. شوية تصاور
