-VIDEO-

 moraycf (..!التسركيل لاينتهي بنهاية رحلة بل يجب ان تكون حياتنا عبارة عن سفر دائم)

في دولة « ريم » الشقيقة خاب ظني فيها بعد ماكان ف بالي نزورها ونگلس فيها شي أسبوع بالكتير ساعة مالقيت فيها مرادي!.. واخا عاودو ليا عليها بالخايب وماشي بالخير گلت نشوف بعينيا ونحكم وداكشي اللي كان.. غير من الدخلة ف الحدود واللي بقيت تانساين باش اساليو ناس الديوانة من القس حيت كان الوقت ديال الغدا بصحتهم، وأنا كانتسنا قرقبت الناب مع واحد العائلة جاية من فاس ناس ناشطة خصوصا واحد فيهم صبيطار 😂 مهم سالاو صحابنا من الماكلة وبداو تايستقبلونا بواحد واحد حتى وصلت نوبتي دخلت قادو لي الفيزا والتصويرة اللي تصورت طلعات تصويرة مزومبية 😂 خرجت من البيرو وأنا تنخمم كيفاش نشد الطريق لنواكشوط حيت ماغاديش نمشي لنواديبو مباشرة قلت نخليها تا الرجوع، مهم طبعت الدخلة خرجت من الحدود بانت ليا واحد القهوة فيها غير السنغاليين جلست فيها تخلطت مع اللي فيها قلقلت السوق عالله ايبان ليا اللي شاد الطريق للعاصمة وداكشي اللي كان من بعد الكلام وشريب أتاي قال مول القهوة خادم-رسول باللي كاين واحد السيد سنغالي جا من البرتغال راه ف الديوانة تسناه عالله تكون شي بلاصة.. مزيانة لكوكاب حيت فعلا فاش جا وتعرفت عليه كان غير هو واحد السيد جاي معاه من كازا وصاحبو اللي كان كايتسناه معايا ف القهوة.. تافقنا على التمن*، و من بعد سلامي وتشكراتي لخادم رسول ركبنا ف واحد الطومبيل اللي دايرها هاد السيد « علي بدرو » للتجارة تايجيب السلعة وتايبيعها جملة ف روصو.. اييه روصو من بعد ماكنت ناوي نمشي لنواكشوط لقيت المركوب ديريكت للسينغال من الحدود تال الحدود 😌😌 ونخلي استكشاف موريتانيا حتى رحلة العودة.. هي هاديك تحركنا ف واحد الجو كان مزيان ماكاين عجاج كان زهري صافي ف أول مرة ندخل فيها هاد البلاد.. مهم ف الطريق لنواكشوط تعارفت مع الدراري اللي معايا ف الطومبيل اللي كلهم من السانيغال، حدايا كان مامور واللي هو كان سباب مع خادم رسول ف هاد المركوب والعزاوي من بعد التكرفيص ف المروك وبالضبط ف كازا قرر باش ارجع لبلادو عند مرتو وبنتو ويكَمّل ف البيع والشرا اللي خلا وتبع حلم الحريگ!.. والقدام كان مول الطوموبيل علي بادرو مهاجر سنغالي ف الديار البرتغالية تايدير التجارة وهاد النوع من التجارة ف شكال، تايجيب السيارة عامرة سلعة تايبيعها جملة ف روصو-السينغال ومن بعد تايبيع الطوموبيل اللي هاد النوع من السيارات البوجو 504  تيخدمو بهم بزاف كطاكسيات ف بلاد التيرانغا؛ وكان حداه السيد محمد درامي وقصة هاد العزاوي بحال مامور غير هو ماشي أول مرة تايحاول احرگ ولكن بزاف د الخطرات وقرر هاد المرة ارجع عند ولادو ومرتو باش ازگي أمورهم مزيان..
ف الحقيقة هاد تلاتة الناس من أطيب خلق الله وهادشي اللي بان ف الرفقة معاهم لمدة يومين.. بوادر هاد التعامل الرائع بان ف التلقائية والعفوية ف حديثهم..
فكل باراج ديال الدرك الموريتاني واللي هاد الباراجات كتار بزاف على طول الطريق الصحرا والقيفار والجوندارم 😂.. ومن بعد ماتاندوزو من الكنترول تانرد البال باللي تايكعاو وفاش سولتهم أكدو ليا داكشي اللي عاودو ليا ف الداخلة على الموريتانيين (المخزن) بدا تايعاود ليا محمد درامي على بزاف د القصص على سوء تعاملهم مع الناس وخصوصا السنغاليين، مهم أنا ف كل باراج غير تايشد الدركي الباسبور وتايقول مغربي؟!.. وتايعيط على صحابو هذا مغربي هههه
دخلنا لنواكشوط بالليل شي 12:30 عرض علينا محمد درامي عند شي عائلة سنغالية نباتو عندهم وقبل مانمشيو تعشينا فواحد السناك سنغالي!.. (زيارتي الأولى لموريتانيا كانت بطعم سنغالي 💯 /💯 😌😁)
صباحا من بعد الفطور ودوش 5/5 كملنا الطريق ناشطين ضاحكين حتى هجروه ليا الجوندارم الملثمون ف الخرجة ديال  نواكشوط من بعد ما كانو تايقلبو الطوموبيل خديت شي تصاور للطبيعة الصحراوية وأنا نتحنكر وصورت الجادارمية ساعا قشعني واحد فيهم وقصدني من بعد ماتصرهطت عليه فاش عيط ليا،،😁 جا لعندي وداني للشاف ديالو وأنا غادي معاه مسحت دوك تصاور بزربة (دار معايا الهاتف مت المزيان ماتبلونتاش وحتا الجادارمي صدق دمدومة ماشدش من عندي الهاتف الذكي 😂) وصلنا للشاف ديالو وگال ليه « هذا بيصور! » گلت ف شوني -الشاف الرجوع الله اش من تصاور!..  – 😂 مهم الشاف شاف الألبوم كامل كانت فيه تقريبا كثر من 200تصويرة وعطاني مشقوفي وگال ليا الصور ممنوع « بالفرونسي 😂».. حيت كون كانت شي تصويرة عندها شي علاقة بالدولة كون ركبت من وراه ف دجييپ..
– أنا بعدا من هاد اللحظة بديت تانحسب شحال بقا لي للروصو..😂 وتنفكر ف الرجوع واللي مع الاسف ف رجوعي هذا نتفوني ف الديوانة فاش بغيت نقاد الفيزا من جديد حيت طلبو مني نخلصها ب الاوقية ومابغاوش الاورو ولاد الحرام طلبو لي واحد التمن باللاوقية واللي فاش حسبتها لقيتها 60اورو عوض 40 وهما نيت اللي صرفو ليا الاورو مهم ضروري ف موريتانيا مع المخزن ماتديرش فيها قافز وعايق.. ومن هاد اللحظة  من بعد اللحظات اللي دوزت ف السنغال رائعين مابغيتش نوخرها بفريع الراس والمرض وكملات ف نواكشوط فاش بغيت نتصور حدا واحد الخصة فيها الدلافين من الاينوكس😀 گلت لواحد العزاوي اشد ليا تصويرة السيد تخلع گال ليا لا بالإشارة وهو ابدل الطريق گاع😕.. ونفس الشي وقع مع التاني اللي طلبت منو ياخد لي فوطو😕.. خبيت الهاتف ف المحفظة وأنا نشريه وفاش سولت گالو لي رآه ممنوع تاخذ التصاور وإلى شافوك البوليس ياخدو ليك التليفون!. مالي ومال هاد الحبس أول حاجة فكرت فيها بالناقص من هاد البلاد مشيت قطعت ديريكت للداخلة من نواكشوط واللي وقعو قصص ف الطريق  زادو كملو ليا سوء الصورة اللي تعاودات ليا على موريتان واللي عشتها مع الاسف (هذا كان زهري العوج😂..)-

مهم من بعد ماتفارقت مع الشاف واللي سولتو بشحال حليب الناقة حيت بانت ليا واحد القرعة حداه 😂  غير ركبت ف الطومبيل مع العزاوة أول حاجة قالو ليا هي .. « ياك قلنا ليك هادو راه أكفس الخلق 😂.. »  مهم قلبناها ضحك وكملنا الطريق، و فواحد الفيلاج تغدينا باللحم مطبوخ فواحد الاناء عجيب عطيتو سمية « المجر » ماتفكر حتى تشوف فيه ساعة أنا خشيت فوجهي 😂 ف الحقيقة مابغاش اتندغ ليا امكن شارفة ديك النعجة  اللي ذابحين الى كانت بعدا نعجة😂😂..
من بعدها ولأول مرة تنمشيو فوق شانطي حقيقي واللي عاد داروه بشراكة مع الشناوة فيه تقريبا شي 200كم رائعة حيث الطريق ف موريتانيا سيئة بواحد الدرجة ماتتصورش ممكن تقول ماكيناش بمرة.. مهم كملنا الطريق مباشرة للروصو-موريتانيا من بعدها ركبنا ف العبارة قطعنا بها نهر السنغال وف روصو-السينغال تسالمت مع علي بدرو و مامور وكملت مع محمد الدرامي اللي عرض عليا وقبلت الدعوة بطبيعة الحال 😌.. #سانيغال

 الثمن: گال ليا 200 درهم عطيتو 150 وغير رجولة منو😌 وف لخر حشمت على عراضي وزدتو 200 من بعد فاش وصلنا لروصو-السنغال نظرا للتارجليت من طرفهم كاملين

***** ******** ******** Tssarkil ********** ******* ***

Breathing the Morning-air; Preservation of Health & Youthful Elasticity; Meditation & Respect .. are the objectives of the Wild-Trip!.. #moraycf

شوفو شوفو .. شوية تصاور