moraycf (..!التسركيل لاينتهي بنهاية رحلة بل يجب ان تكون حياتنا عبارة عن سفر دائم)
ف اخر ايام تسركيلي عند جبالة بديت تاندير فيها سائح ابتداءا من تطوان من بعد ماتسركلت ف الشاون هاد المدينة اللي خدات حقها من الشهرة حتى بدات تاتخرج على الاطار اللي كان معروف عليها بالهدوء والجمالية ديالها خصوصاً بالتوسع العمراني ديالها وتصرفات المحسوبين ع السياحة وهاد المشاكل اللي تاتعرفهم المدن السياحية مع الاسف هادشي اللي مابغيتش تطيح فيه هاد اللؤلؤة الزرقاء.. ولكن هانية باقي فيها مايتشاف وبزايد 😎😜
مهم من بعد ماخديت حقي ف الزيارة شديت الكار ديريكت للتطوان واللي كانت تاني زيارة ولكن تنعتبرها الاولى من حيت التسعسيگ « الدوران😜 » واللي زرت فيها بزاف د البلايص مرة بالطوبيس وبزاف د المرات على رجليا 😂 وبطبيعة الحال الصاك ف المحطة كما العادة 😜.. ف الحقيقة هاد مدينة واعرة بالنواحي ديالها من جبال وبحور زعما حمامة واش من حمامة 😌.. واللي زدت عرفتها كثر مع الصديق العزاوي با كرم واللي كان ولابد نشوفو من بعد اول واخر مرة تلاقينا فيها أثناء الصعود لتوبقال واللي كانت بالنسبة ليا أول مرة نطلع فيها وتاني مرة بالنسبة ليه 💪😎.. العزاوي خطير ف الجبال
من بعد ماتلاقينا مشينا للدار عندو ستاريحت شوية.. مع الباجباطي الخفيف 😌 على كيدازت الرحلة وعلى الرحلات ديالو… بديت تانحس بشوية الصداع ف رجلي اللي كانت بغات تطرطق ف كالابلانكا، وبديت تانحس كذلك ببداية الزكام وخاصني نزرب عليه قبل مايزب عليا ولكن الدوا ف الصاك و ف المحطة 😓 ماعليش.. هي هاديك قترح عليا باكرم نتسكعو ومنها نيت ندوزو للمحطة نهزو الدوا داكشي اللي كان، تسركلنا مزيان و وخرناها بطلوع جبل بوعنان هاد البلاصة اللي عزيزة على با كرم وفيها واحد العين ياسلام 😌« منبع الحياة » الما ديالها تشرب ماتروا تبقى غير تاتورد 😂.. من بعد ما عمرت القرعة كملنا الطلوع وجلسنا ف الجبل ف مكان تابع لواحد القهوة شعبية عتيقة تاتطل على المدينة ف واحد المنظر ياسلام وخصوصا فاش طاح الباش وشعلو ضواو المدينة 😌.. الحديث مع با كرم مايتسخاش بيه.. ف رجعونا تلاقينا بصحابو تاهوما ناس تسركل والتغامير⛺ كملنا طريقنا للدار من بعد ماوصلنا واحد العزاوي صاحب كرم تعشينا وتناقشنا واللي قررت باش غادي نتحرك غدا صباحا لمدينة طنجة وف الحقيقة بدا تايدخل عليا العيا مزيان.. وداكشي اللي كان من بعدما فقت الصباح الباكر وسلمت على باكرم وشكرتو وبصوابو كان ولابد وضروري ماندي معايا شنيك وكاس اليوغورت –واللي قسّيتهم ف طنجة– حيت مابغيتش نبقى حتى نفطر 😁🙏 فاش خرجت شديت الطريق ديريكت المحطة خديت الكار لطنجة واللي دخلتها بكري😌 حطيت الصاك ف المحطة وبديت تنخيط الطرقان حتا حفاو ليا السوميلات د رجليا 😂 ومن بعد ماشفت ماتيسر من مدينة طنجة قلت نمشي نشوف مقهى الحافة المشهورة وداكشي اللي كان تانسول من واحد لاخر حتى وصلت ليها ومن الدخلة تصدمت فيها نظرا انه كان عندي عليها نظرة ثقافية 📖 ساعة من ضجيج موسيقى الراي المزعجة « راي تشرميل » 😒 ماشي داك الراي الزوين 😁 ولكن الصدمة هي فاش دخلت الارضية كانت موسخة بالبينتات الگارو و الوراق ديال المسمن وباكيات السجائر الفارغة 😠 مهم جلست وطلبت أتاي اللي هو المشروب اللي كاين 😒 خرجت الكتاب باش نقرا شوية قبل مايجي الصديق حمزة ولكن ماقدرت اكتفيت بأخذ صورة خادعة لجمال المكان أمام البحر😁 (مهم للإشارة بلا ماننصح واش تمشيو ليها ولا لا راه سدوها هاد الايامات ممكن بمرة!).. مهم فاش وصل الصديق حمزة مشيت عندو تلاقينا وبدا عندي الاكتشاف الحقيقي للمدينة برفقته واللي ف الحقيقة دار كثر من جهدو باش عرفني بالمدينة واللي توفق بشكل كبير جدا واللي ماخلا لي باقي فين ندوي من غير نشكرو بزاف معاه اكتشفت غابة بيرداكريس هاد الغابة اللي عندها قصة زوينة بواحد القصر ‘أو دار الغابة’ المشهورة به واللي قصتو بناه واحد السفير أمريكي لزوجتو بحال شكل قصة قصر الباهية ف مراكش!😜 ومن غير هاد القصر.. اللي عجبني كتر هو المنظر البانورامي من فوق الجبل الأخضر على البحر وجمال الطبيعة على جنباته 😍😌.. ومن بين البلايص أيضا اللي عرفني بهم باحمزة هي منطقة أشقار من بعد ماحطينا السيارة درنا لامارش على طول الشط والتي كانت فكرة المشي 🚶 من طرف حمزة لمعرفته عشقي للمشي 😍🙏 مهم على طول شط البحر وجمال زرقة مياهه وروعتها والتي استمتعت بها وبالحديث.. ماعرفتش كي درنا للطريق حتى وصلنا لمغارة هرقل درنا زيارة سياحية للمكان مع تناول وجبة الغداء بواحد تاگرة (طاجين شمالي) نعاماس فاعل تارك😌 بصاحتنا 😜😂.. وفاش شبعات الكرش ومن بعد الراحة استكملنا زيارة المدينة حتى طاح الليل وبداية استمتاعي بليلها وف شي بلايص زوينين باطلالتهم على البحر ف منظر ليلي جميل 😌.. وختمناها بزيارة للمرسى واخا الليل تقريبا كانت العشرة وشي صريف الناس كانت تاتبيع وتسترزق 💪🙏.. واحد اللقطة ف مدينة طنجة زوينة هي الطبيعة يكفي تضرب بالطوموبيل ولا الموطو شي 5كيلو من لاكوط وهانتا خرجتي للطبيعة البكر 😀 ٱنا جاتني ف شكل نظرا لمدينة طنجة وكبرها، حيت ف مراكش خاصك تضرب القليلة واحد 30كم عاد تساطح مع الخضورية والواد 😂..
ف ختام الزيارة ورحلتي عند جبالة واللي كانت بدايتها بنقاوة القلب وطيبوبته مع اجمل انسانة الأدبية هاجر.. وملاقاة عاشق السفر والترحال البطل كرم، وختامها كان مع صاحب مسك القول السديد والفكر العميق با حمزة الانسان الحق..
خلاصة قولي في رحلتي البسيطة هاته في رحاب أهل الشرق والريف تكمن في اجتماع متعة السفر بجمال طبيعة الأماكن ووعي الأشخاص الذين صادفتهم في الطريق .. أشياء جعلت من رحلتي في مجملها روعة في روعة..
.. وأتوجه خاصة بالشكر كل الشكر على كل شيء للأحبة هاجر، كرم، وحمزة 😍🙏 دمتم مبدعون في أعمال حياتكم ورافقتكم السعادة والمحبة أيها الرائعون..
عشقي للسفر لاينتهي بنهاية رحلة، بل هو نمط حياة
***** ******** ******** Tssarkil ********** ******* ***
Breathing the Morning-air; Preservation of Health & Youthful Elasticity; Meditation & Respect .. are the objectives of the Wild-Trip!.. #moraycf
شوفو شوفو .. شوية التصاور
