موقع التسركيل الخاص بالسفر و الاستكشاف

 moraycf (..!التسركيل لاينتهي بنهاية رحلة بل يجب ان تكون حياتنا عبارة عن سفر دائم)

من بعد ماقررت نشد الطريق بطريقة متقطعة ف اتجاه تطوان مرورا بين فجوج الريف، وكان غرضي هو نشوف ونستمتع بأشجار الارز وبجمال المنطقة وداكشي اللي كان بزيارتي لتارجيست وضواحيها ومن بعدها منطقة اساگن واللي دهشروني شجار لارز الكبيرة والعاطية العين
ولكن من ورا هاد الاشجار كاينين دواور ناسهم غير مسميين عايشين وصافي 😞 وسط هاد الطبيعة المبوگصة وهاد الخضورة على حد الشوف!.. تايعانيو فايام البرد وتايدمرو ف الشهور الباقية باش اجمعو فلوس الحطب على قبل الشتوا!.. هذا غير مثل بسيط على المعاناة ديالهم على ماخبرنا به واحد من ناس المنطقة ف زيارتي الاولى أنا والأخ ديالي لنفس المكان هادي 4سنين، ونفس الواقع عاوتّاني شفتو وتعاود ليا 😞 يعني ماتغير والو ف گاع هاد المدة وباقي من غير الشوانط اللي ف الحقيقة الطريق تگادات ومازالين خدامين فيها وبطبيعة الحال ماشي ف خاطر المواطن ولكن هانية هاحنا مستافدين على ظهر الغير 😁😌 (أحسن مثال طريق تشكا تقادات على قبل محطة نور والآليات اللي تايديو باش اكملو المشروع، وماشي ف خاطرك ألمروكي!..)
مهم ماعليش، وسط هاد المعاناة المخفية بين جمال طبيعة المنطقة وبكل أنانية خديت لي وللمكان صور محاولا الاستمتاع متجاهلا بكل أسى هذا الواقع واستكملت التسركيل مباشرة الى تطوان متجاوزا في طريقي مدينة شفشاون😁حيت غادي نرجع ليها حيت داير ف بلاني نخيم شي جوج د ليلات ف واد لاو، وفعلا فاش وصلت للتطوان صباحا سولت على المركوب لواد لاو گالو لي خود الطوبيس وراوني بلاصتو ركبت ب سبعة الدراهم وف الطريق عجباتني الطريق بزاف اللي كلها على جنب البحر وف الجبل.. ولكن الصدمة هي فاش وصلت لواد لاو اللي لقيتها عامرة بفيروس السيما وأوراش البناء « اش هاد الحبس😠 » مهم مانزلت من الطوبيس تال تيرمينيس ف الخرجة ديال هاد الفيلاج، واخا كاين مايتشاف والطبيعة مزيانة ف الحقيقة تشوكيت ف هاد القنت اللي واخد غير الشنعة وتجرّات ليا ليه الشحيمة ساعة وتصدمت فيه حيت بحال هاكا بلايص شابع منهم ومن طبيعتهم داكشي باش قررت نرجع فحالي للتطوان من بعد ماحرتكتها وتسركلت فيها وباجباطيت مع شي عزاوا تم اللي واحد فيهم قال ليا راه الملك فاش جا لهنا عجباتو وقال ليهم اتهلاو فيها.. قلت ليه مزيان ولكن خرجو عليها ههه.. وحاجة اللي زوينة هو المركوب الناس فرحانين من بعد مادارو ليهم الطوبيس حيت كانو تايركبو ب 20 درهم ف طاكسي
مهم بحال هاد البلايص غير ديال الصيف وللناس اللي عزيز عليهم بحال هاد العالم!..😜
أول حاجة فاش دخلت للتطوان من حد باقي الوقت صباح قلت نمشي لأقشور نخيم فيها😁 شديت الكار لشفشاون ب 20درهم ونزلت ف دارقوبع باش نشد طاكسي ديريكت لأقشور وكان هاد القرار أغبى قرار حيت كون غير كملت تال لشفشاون وناخد المركوب مباشرة، حيت تنشرت تما تانتسنا الترنسبور و والو مهم ستغليت هاد النشرة شارجيت فيها التليفون ف واحد القهوة وبغيت نشد شي قرعة الما حيت غرضي ف الخاوي😁 .. طلبت للسيد القرعة جبدها من التلاجة وهو يقول لي غادي نعطيك الشاون « ماركة ديال الما » حيت سيدي علي مقاطعينها قلت ليه مرحبا وعلاش قال: غالية، سولتو وهاد الشاون بشحال قال ب 6دراهم! قلت ليه ارا سيدي علي 😒 أنا راه أصلا سيدي حرازم اللي تانشد ولكن مقطوع ليها الحس هنا وزعما الشاون بنت البلاد خاصها تكون ناقصة تمن ههه (هاد البلان ديال #المقاطعة كنت عليه خارج التغطية) مهم تسنيت تاعييت وأنا نشدها كعّابي طالع وف الطريق فاش بغيت نوكل السنونو شفت فيه ماعجبنيش فاش شربتو الما بدا تايترعد وتايحرك راسو بطريقة غريبة هنا عرفت صافي بغا ايودع من بعد تلاتة ايام وهو معايا من كالابلانكا وها هو اليوم ف قرابة أقشور غادي ايموت وداكشي اللي كان وأول مرة تانشوف حر الموت عند الطيور من بعد ماشفتها مع « ميغا » و « مرجان » (القطط) دياولنا 😞😢 مهم كلكلمتو مزيان وخليتو ف الطاگية -حتى من بعد ودفنتو- وأنا نكمل الطريق حتى وقف عليا واحد الخطاف سولني في غادي جاوبتو فين، ساعة هو غادي لتلمبوط! ماعليش ركبت معاه حطني حدا واحد البلاكة بين طريق تلمبوط وأقشور ومن هنا كملتها ديريكت تال أقشور واللي تلاقيت ف الطريق مع واحد العزاوي من الراشيدية تاهو تصيد ف قلة المركوب ساعة كان لابس الكلاص 😂 بقا معايا من بعد ماتعارفنا شادين الطريق اللي مابغاتش تسالي بكترة الجبال والطلوع وزايداها حتى الشتا ولكن ف الحقيقة ماسخيتش وخا الصاك كان تقيل ولكن بروعة الطبيعة جمالها الخلاب نساني ف العيا من غير واحد الكلب ولد الكلبة اللي خرج لينا من بعد ماكنت تانعطي ف النصائح وكيفية التعامل مع الكلاب الضالة ف الطريق للعزاوي اللي معايا حيت ف الاول شاف واحد الكلب وهو ايقفز! قال تايخاف من الكلاب!!.. ولكن ف هاد لحظة الحقيقة السيد رجليه تخاصمو معاه، مع ولد الكلبة داك الكلب جاهل تايغوت بجهدو كامل ههه شديت العزاوي من ايديه قلت ليه غير برد وحاول ماتخلعش وأنا كثر منو😂😂 مهم الكلب جاهل حدايا تاينبح جاعر تايحنقز شفتو قرب حدا رجليا بزاف خفتو لايعض ورّكت على القرعة اللي ف ايدي درت بها الصداع وأنا ف نفس الوقت تانهضر مع العزاوي تانحاول باش مايهرب وهادشي اللي خفت منو كان بغا ايوقع حيت الكلب حيد من حدايا ومشا ليه 😂 وأراك تشوف العزاوي رجليه فرفرو شديتو عنگتو وقلت ليه « الله ارحم الوالدين الى ماتبّت.. الكلب حشم على عاراضو وهو ارجع من بعد ماخرّانا 😂😂 قلبناها ضحك ومن بعد شي 3سوايع وصلنا لأقشور تفارقت أنا والعزاوي.. دبرت فين غادي نطونطي حطيت الطونط والصاك تكالميت ومن بعدها طلعت نشوف الشلالات واللي غير الطريق تستمتع كثر ف الحقيقة المكان ماكدبوش فاش سماوه الجنة الضائعة 😊 .. رجعت الفيلا ديالي دخلت الكوزينة طيبت العشا بواحد الگميلة عويناتكم واللي تقاسمتها مع واحد الكلب ولد عائلة ماشي بحال داك الصعصع تال الكلاب فيهم وفيهم.. واللي بالليل دار فيها حارس شخصي ليا مشكور..
من بعد استمتعت بهاد الجنة تستحق اتزار..الواحد اللي بمركوبو حالو ساهل واللي ماعندوش من الاحسن امشي لأقشور من شفشاون ب 20درهم 😜.. ومن بعد ماعرفت شوية علاش داك البلان ديال قرعة الما و #المقاطعة من بعد دويت مع الناس ف واحد القهوة بان ليا باللي القضية نايضة قلت خليها تانشوف هاد البلان مزيان ونقلب عليه مع كلها وتايلغي بلغاه ههه.. مشيت لشفشاون ندور فيها شويا ولكن نشوف حتى شفشاون الغير الزرقاء زعما من غير المدينة القديمة كتشفتها شوية هربت منها لعند الشاون الزرقة 😁 درت بين دروبها حتى حفاو ليا سوميلات رجليا

***** ******** ******** Tssarkil ********** ******* ***

Breathing the Morning-air; Preservation of Health & Youthful Elasticity; Meditation & Respect .. are the objectives of the Wild-Trip!.. #moraycf

شوفو شوفو .. شوية تصاور