moraycf (..!التسركيل لاينتهي بنهاية رحلة بل يجب ان تكون حياتنا عبارة عن سفر دائم)
وأنا ف غرق النعاس داخل الشابولا⛺ وقفت عليا خير وسلام ف المنام على ديك الرمية د الكلاب ‘اضغط هنا’ اللي رميتني ف الجبل فاش كنت نازل نشوف « صخرة كأس العالم » ف كالابلانكا 😁 بسباب كثرة الشكا والبكا على قصوحية الطلعات اللي ف الجبل.. ( هذا كان منام خير وسلام)..
وف التصبيحة من بعد ليلة الحتييت والباجباطي مع المخازنية ضرباتها بفطير على قد الحال ببيضات هشاش وزويتة بلدية، وبعدها جمعت قجاقلي من الشابولا ⛺ ومشيت لپوسط نشد پاسپوري (ماجبتش كارط ناسيونال معايا😂 ودَّرتها😁) والپاوربانكات خليتهم اتشارجاو عندهم.. فاش عطاهم ليا الشاف عرض عليا بزاف د الحوايج ناخدهم من قس وزيت… واللي كانو عندي وبزيادة مشكور بزاف وعلى التعامل ديالهم كاملين 💪 شكرتو وعمرت قريعاتي د الما وشديت الطريق من اديها وطلعنا راجعين لتاوريرت من نفس الطريق اللي نزلت منها 😞.. ف الحقيقة » خريت 😫 » ( لست اسف على المصطلح 😜) مهم دقة- دقة وتاناخد تصيورات موانس مع # السنونو اللي حطيتو ف قبي 😁 وفاش تقريبا ضربت النص ف الطريق لقيتني گاعد مسند حجرة حزين مهموم على ديك الرمية اللي رميتني البارح فاش كعيتني!.. طلبت مني السماحة وقبلتها مني بقلب صافي بلا خديعة تعانقنا وكملنا الطريق ف سلام ومتعة بمنظر الخضورة اللي تحرمنا منها بسباب الضبابة اللي كانت عند وصولنا
وصلت لتاوريرت من بعد معاناة خفيفة مع الصعود😒 كان الفيلاج خاوي نظرا للصباح الباكر نسبيا وبسبب المطر الخفيف ☔ جلست نستارح جبدت شي كعك جبتو معايا من وجدة قسيتو مع رايبي، سنونو تاهو وكلت ليه شي نميلات 😁 اتعالج تاهو.. وانا تانستمتع بقطيرات الشتا حتى بانت واحد 190 قلت ليه » فرخانة « ؟! قال اييه.. مزيانة حطيت الصاك ف الكوفر ركبت دار بيا دورة شرفية ف الفيلاج حبا ف البلايص باش اتجمعو 😜 ومزيانة ليا 😌.. شدينا الطريق لفرخانة ومن بعدها كملت تال الناضور اللي مشيت ديريكت للمحطة حطيت الصاك وعطيتها للتسركل ف شوارع المدينة وأزقتها وكورنيشها… والناس مشغولا بشغالاتها ودراستها وناس الرياضة ف الكورنيش غادين-جايين وانا والسنونو مستونيين هانيين مرتاحين البال
المدينة عشقتها ومليتها فيساع هذا حالي مع المدن رجعت من طريق مخالفة باش نشوف كتر المدينة وانا تانخيط الدروبة بان ليا واحد مول المسمن قلت مزيانة نعصر عندو شوية باش نشارجي تليفون 😜 فاش تانتسنا نوبتي كان تايهضر مع شي كليان ناشط معاهم، غير سالاو وغير قلت ليه كاين اتاي بلكنة اللي لاعلاقة بالمنطقة وهو اقلب وجهو ومعاه وجهي تاحتى انا 😂 ( مالنا مانخافوش) قال ليا بنبرة تقيلة ع القلب ماكاينش ( يعني ماكاين شارج 😞😂) مهم قلت بتعنطيزة دير شي تلاتة دراهم مسمن بالكوفيتير ورا خمسة دراهم گدامك!!.. ( ف الحقيقة بحال هاد البلان وقع ليا ف الخرجة د السعيدية وهنا ف الناضور ولكن ف غالب تلاقيت مع ناس خايبين😂) خديت داك المسمن اللي ف الاصل كنت دايرو طريق ف خاطر الشارج😁 عطيتو لواحد السيد.. كملت طريقي للمحطة قطعت ورقة للحسيمة ركبت القدام املا باش نشوف شي بلاصة تجرني ليها بجمالها باش ننزل فيها كما العادة ساعة مع الاسف لاشيء جدير بالاهتمام نفس المناظر تتكرر 😞.. الطريق مباشرة الى الحسيمة اللي نزلت فيها ف محطة قالو لي عليها زوينة ساعة محطة عادية وخا الملك اللي افتتحها 😁😁 مهم كما العادة الصاك ف مستودع الامتعة خديت طاكسي 10دراهم لأجدير مسقط رأس الامير المجاهد سيدي مولاي محمد بن عبدالكريم الخطابي واللي كان من الاحسن اتعطى ليها الاهتمام الاول لهاد المدينة وذلك بارجاع رفات الامير المجاهد لبلده الام على الغرار الجارة الجزائر مع الامير عبدالقادر اللي مشاو وارجعو الرفات ديالو من سوريا وبناو ليه ضريح بقيمتو ومكانتو ف التاريخ الجزائري 😍💪 وهادشي اللي تمنيتو ومازال نترجا امتى اجي النهار اللي الدولة تحترم تاريخ هاد البلاد العتيق والكبير واللي من بين هاد التاريخ العظيم كاينة شخصية سيدي مولاي محند اللي خاصو اتنصف ف حقو من طرف بلادو أقل حاجة هي ارجعو الرفات ديالو لأجدير ف ضريح عظيم!..
ومن الحوايج اللي برزطوني ف قبالة شاطئ الصفيحة هما شي حجيرات قراب لبلاج ولكن تابعين لصبليون وهادشي امكن نفسرو بالخبت ونار الحقد اللي باقي ماطفات ف صدورهم من التقمينة اللي قمنهوم با الخطابي 😂.. وف نفس الوقت حسيت بالحگرة فاش تانشوف هاد المنظر بقا لينا غير نهضرو على سبتة ومليلية
ماعليناش ساليت زيارتي لأجدير بالخف وشريت شي بيضات وشي بينينات 😁 من أجل الكاسكروط والفطور.. رجعت للحسيمة تسركلت فيها شوية قهروني العگابي 😂 لقيتها مابيهاش كزيارتي الأولى ليها 😌 رجعت ف العشاوي للمحطة ومن زهري كي دخلت المحطة وهي الشتا بدات تعزف سيمفونية الماء 😁 جلست تنفكر ف بلان اش ندير وفين نمشي.. و ف الاخر قررت ننزل للتطوان ولكن تكون الطريق مقطعة باش نشوف الفيلاجات ف جبال الريف
***** ******** ******** Tssarkil ********** ******* ***
Breathing the Morning-air; Preservation of Health & Youthful Elasticity; Meditation & Respect .. are the objectives of the Wild-Trip!.. #moraycf
