moraycf (..!التسركيل لاينتهي بنهاية رحلة بل يجب ان تكون حياتنا عبارة عن سفر دائم)
ف هاد التسركيلة اللي درت لبلاد جبالة هدفها الاول هو المتعة لاغير وزيارة بعض الاماكن اللي ماشفتهومش ف زيارتي الاولى مع الاخ ديالي بالسيارة الجميلة لالا كريستينا السوداء 😁.. وهادشي اللي خلاني نركز ف اغلب الاوقات من تسركيلي على الاماكن المعروفة ف زيارتها عند الغير حيت من طبعي تانفوت البلايص المعروفين لسبب فقط واللي هو أغلبهم تايكونو واخدين غير الشنعة… ولكن هاد المرّة نجرّب ونشوف حسن من ديك اللقطة ديال سمعت وقالو لي
وهادشي اللي درت ف دخولي للناضور صباحا (بلدية الناضور عافاكم راه ضرني راسي.. احمبكم زگّيو معانا وكتبو سمية المدينة إمّا بالحرف الضاد ولا الظاد 😂ههه).. مهم قررت باش نمشي لواحد البلاصة اغلب الناس اللي تتحب التغامير تاتمشي ليها وتايتفننو ف اخذ الصور ليها واللي هي » كالا بلانكا » اول حاجة درت هي سولت على المركوب ليها ولقيتو ماكاينش من غير الطاكسيات اللي بغا واحد اوصلني ليها ب 300 درهم، وبفضل التسوال وجهوني ناس د الخير نشد طاكسي لفيلاج » فرخانة » ب 10دراهم وداكشي اللي كان وفاش وصلت فرخانة اللي جات فوق مليلية بشي كيلومترات قلَّبت على اللي كمل بي الطريق لكالا بلانكا تاويت مع واحد قال لي 100 درهم قاصحة! حيت تايجي بحال هاد التمن مزيان ف الكثرة، ستة ناس تاتجيهم مزيانة بوحدي صعيب، مهم عاود باجباطيت مع الناس تم وهو انصحني واحد الشيفور نشد خطاف لتاوريرت من بعد نكمل على رجلي حيت هذا هو الحل مهم ركبت مع واحد ب 7 دراهم نرلني قدام الطريق اللي منها ديريكت لهاد البلاصة ديال كالا بلانكا، (دوك الحجيرات المبوكصين تايسيميو المشهورة فيهم ب » حجرة كاس العالم »!!.. 😁) مهم نزلت و انا نشد ليها الطريق واللي كانت كلها نزول 😌😌 والضبابة كانت كثيرة نازلة والريح مجهد .. هانية 😌 😎 ومع النزول بدا تايبان واحد مشكل بسيط ف هاد الطريق اللي هي عبارة عن جبل 🗻 نازلو، والمشكل هو قضية الرجوع من نفس الطريق حيت فيها شي طلعات قاصحين نزلتهم غير بفران-امان😂 ههه ضرت ف راسي دورة شيطانية على هاد السلبية وباقي حتى كاع ماوصلت وتانفكر ف الرجوع تفو عليا تفو!.. هههه😂 تخاصمت معايا وخليتني تالف من ورايا وكملت طريق نزولي فرحان
فاش قربت نكمل هاد الجبل لقيت واحد جوج طرقان تلفت ساعة شفت من بعيد واحد السارح مع معيزو قصدتو من بعد السلام سولتو و للطريق وجهني وبدوري شكرتو واخا كان مشكل د اللغة ساعة مشكور تقاتل باش اتكلم معايا بالدارجة
كملت الطريق بقات اخر تهويدة و ف نزولي معاها بدا تايبان على اليمين الفيلاج وواحد الدار معزولة اللي من بعد غادي نعس حداها ف حماية ناس القوات المساعدة حيت المركز ديالهم هي ديك الدار😁.. ماعليناش ف الخطوات الاخيرة ف النزول تايبان لي واحد الطير مسكين معطوب « السنونو » خديتو معايا حتى انعالجو من بعد. ف الحقيقة فاش وصلت من بعد هاد العذاب ديال الطريق و شي ساعة تقريبا ديال النزول فاش شفت هاد كالا بلانكا وغامرت باش ندوز ليها بين الصخر والبحر هايج غضبان ورجلي اللي كنت غادي نخليها تم بين الصخر لقيتو مكان عادي شبه مهجور مهمول،😞 حاجة اللي تاتبرد القلب هو الجمال ديال نحت الطبيعة لهاد الحجر وبديك الطريقة اللي واقف بها قبالة البحر وبلونو الاصفر😍 خديت لي شي بركة ديال التصاور 📷 وانا نطلع نمشي نشوف صاكي واش باقي بلاصتو 😂 حيت رميتو عشوائيا باش نهبط مخفف 😁 ساعة انا اصلا من الاول كنت محضي 😌 من طرف المخازنية واللي ف الحقيقة مشكورين بزاف على التعامل ديالهم معايا من الشاف ديالهم السي النصيري وكاع المخازنية الاخرين ف تعاملهم و على الشابولا ⛺ اللي خلاوها ليا نبات فيها.. الحقيقة ف تعاملهم تاتحس براسك مواطن لاول مرة اللي ماتتحس بها ف المدن 😞 مع الاسف..
دوزت معاهم الليلة دوينا قرقبنا الناب ف بزاف د مواضيع داخل واحد الگيطون⛺ الدراري مقصحين ولكن قايمين بخدمتهم واخا قاصحة 💪 تحية ليهم وشكرا بزاف
بس: ولد الحرام واحد المش باسل دخل لشابولا بالليل قاليك بغا اقسي السنونو ساعة شديت ماماه 😂 طلبني من بعد المزاوكة وانا نطلقو تاقيت فيه وجه الله وحيت أنا زوين الله اعمّرها دار
***** ******** ******** Tssarkil ********** ******* ***
Breathing the Morning-air; Preservation of Health & Youthful Elasticity; Meditation & Respect .. are the objectives of the Wild-Trip!.. #moraycf
