moraycf (..!التسركيل لاينتهي بنهاية رحلة بل يجب ان تكون حياتنا عبارة عن سفر دائم)
الخروج من وجدة ف اتجاه السعيدية ثم البدأ في الرحلة على الأقدام كان مخططي.. لكن هيهات ثم هيهات ههه😂😂 بان الشوار من نهار الاول ف وجدة اللي كملتو ف السعيدية وف نفس النهار بديت التحرتيك ف طريقي « لراس الما » ولكن تال هنا كان البلان ديال المشي 🚶 باقي حتى قربت ندخل ل » راس لما » وهي تدور ليا ف الخوا عاود، وقررت ندير داك البلان اللّي سبق ودرتو ف زيارتي لموريتان وسانيغال واللي هو ناخد الترنسبور ونتوقف ف البلايص اللّي ايعجبوني ف الطريق وهذا ماكان.. ( هادشي وصلت ليه بسباب طبيعة المكان اللي تاتشابه واللي عرفت راسي ف بحال هاد المواقف تانتبرزط بالحوايج المعاودة والروتين!!)
فاش دخلت صباحا ل »الراس لما » الفيلاج كان خاوي تايصفر درت تسركيلة ف الپلايا واخا البحر كان هايج!! تلاقيت بواحد العزاوي تايكرط الرملة تايجبد الكوكياج قال لي تايقاد به الطعم!.. ماعليناش كمَّلت الطريق نشوف كتر هاد الفيلاج ما لقيت فيه مايتشاف بحال هاد البلايص مديورين غير للصيف والزماگرية😜… مهم شربت واحد كاس د الرايب عند واحد السيد عاد تسفال من عندي 😁 وف خلاصي ليه سولتو على بلايص الترنسبور قال لي الرومبوا تلقا الخطافا وعليه مشيت ليها من بعد واحد الطلعة بنت الحلال مابيهاش 😁😜 لقيت الخطاف ركبت ب 20درهم للقرية « ارکمان » واللي هاد القرية هي بداية داك السد الطبيعي ديال » مارتشيكا » واللي مع الاسف مع الساك القايد صادفني حدا البلاج ( وصلوها ليه ولاد الناس😂) وقال لي بطريقة مصوابة ممنوع تدخل پارک راه تايصاوبوه زعما التهيئة وداك السبيد وكمل وقال: ها البلاج ودور شوية ف القرية مع راسك! قلت ليه شكرا ههه
بالناقص من هاد پارک اللي كنت ناوي فيه نبات ومادام باقي الحال شديت الطوبيس 7دراهم للناضور نستغل هاد الصباح باش نمشي ل » كارا بلانكا » اللي كتر عليها الحديث وكثرو تصاورها نشوف هاد القنت كداير من غير دوك التصاور ديال الصخر..😁 واش المنطقة تستاهل ولا غير الشنعة
***** ******** ******** Tssarkil ********** ******
Breathing the Morning-air; Preservation of Health & Youthful Elasticity; Meditation & Respect .. are the objectives of the Wild-Trip!.. ] #moraycf
